Санхүүгийн мэдээллийн технологийн төв УТҮГ нь “Гадаадын жуулчны хувийн хэрэгцээнд зориулж худалдан авсан бараанд төлсөн НӨАТ-ын буцаан олголтын төлбөрийн баримтыг бүртгэх, түүнд хяналт тавих журам”-ийн хэрэгжилтийн хүрээнд цахим төлбөрийн баримтын систем /EBARIMT/-д нэмэлт хөгжүүлэлтийг хийсэн бөгөөд гадаадын жуулчдад хэрэглэхэд илүү хялбар, ойлгомжтой болгох сайжруулалтыг тасралтгүй хийж, системийн хэвийн ажиллагааг ханган ажиллалаа.

Мөн НӨАТ-ын буцаан олголт буюу “Tax Refund”-ийг арилжааны банкнуудаар дамжуулан олгох бөгөөд уг үйл ажиллагааг бүх банкнуудад санал болгосны дагуу Төрийн банк болон Голомт банк хамтран хэрэгжүүлж байна. Төлбөр тооцооны шийдлүүдийг ашиглан Голомт банк нь олон улсын /MASTER, VISA, AMEX, UPI/ картуудаар гадаад гүйлгээ хийх боломжийг бүрдүүлсэн. Төрийн банк долларын ATM машиныг Монгол улсад анх удаа ашиглалтад оруулснаар гадаадын жуулчдад бэлэн болон бэлэн бусаар буцаан олголтоо авах олон сонголтуудыг бий болгосон чухал ач холбогдол бүхий ажлуудыг хамтран хийж гүйцэтгэлээ. Ийнхүү бид олон улсын жишигт нийцсэн технологийн шийдлүүдийг амжилттай хэрэгжүүлж тодорхой үр дүнд хүрснийг 2024 оны 10-р сарын 01-ний өдрийн байдлаар танилцуулж байна. Үүнд:

Бүртгүүлсэн хэрэглэгчдийн тоон мэдээлэл: 12,936 

Борлуулагч байгууллагын тоо: 10 

Бүртгүүлсэн баримтын тоо: 13,250

Буцаан олголт авсан гадаад иргэний тоо: 9,041

Системд бүртгүүлсэн нийт жуулчдын 94% нь КИОСК төхөөрөмжөөс, 6% нь  EBARIMT аппликейшнээр бүртгүүлжээ. 

Системийг нэвтрүүлэх ажлын хүрээнд Татварын ерөнхий газар, Монголын аялал жуулчлалын холбоотой хамтран  тур оператор компаниуд болон  уг үйлчилгээг үзүүлэхээр татварын албанд хүсэлт ирүүлсэн “Говь ХХК”, “Эвсэг кашемир ХХК”, “Ханбогд кашемир ХХК”-д сургалт, мэдээллийг тогтмол өгч жуулчдад НӨАТ-ын буцаан олголтыг олгох үйлчилгээг амжилттай нэвтрүүлэв. Түүнчлэн УТҮГ нь хувийн хэвшлийн байгууллагуудтай хамтран хууль тогтоомжийн биелэлтийг үр дүнтэй хэрэгжүүлэх төр, хувийн хэвшлийн хамтын ажиллагааг сайжруулах бодлого шийдвэрийг үйл ажиллагаандаа тусган ажиллаж байна.